ត្រៀមការធ្វើដំណើររបស់អ្នក

លោកអ្នកអាចធ្វើឱ្យការត្រួតពិនិត្យសន្តិសុខរបស់លោកអ្នកប្រព្រឹត្តទៅបានលឿនដោយត្រៀមលក្ខណៈជាមុនឱ្យហើយស្រេច។ កាន់ឯកសារធ្វើដំណើរនិងប័ណ្ណឡើងយន្តហោះនៅក្នុងដៃ ហើយដោះវត្ថុផ្ទាល់ខ្លួនដាក់ទៅក្នុងកញ្ច្រែងជ័រ។

1. យកកុំព្យូទ័រ និង/ឬឧបករណ៍អេឡិចត្រូនិចផ្សេងទៀតចេញពីកាបូបស្ពាយ
2. យកលុយកាក់ សោរ ទូរស័ព្ទដៃ និងវត្ថុផ្ទាល់ខ្លួនផ្សេងទៀត ចេញពីហោប៉ៅខោ ហើយដាក់ទៅក្នុងហោប៉ៅអាវធំ ឬអាវរងា បើមិនអនុញ្ញាតឱ្យធ្វើបែបនេះទេ ត្រូវដាក់ទៅក្នុងកញ្ច្រែងក៏បាន
3. ដោះអាវធំ/អាវរងា ហើយដាក់វាទៅក្នុងកញ្ច្រែងជ័រ
4. បើមានវត្ថុរាវ សូមប្រាប់ ហើយដាក់វាដោយឡែក៖ បើយកវត្ថុរាវតាមខ្លួន សូមដាក់ក្នុងថង់ថ្លា ក្នុងកាបូបយួរដៃរបស់លោកអ្នក។ (សូមមើលបន្ថែមក្នុងផ្នែកវត្ថុជាប់បម្រាម)។
5. ដោះខ្សែក្រវាត់ ឬស្បែកជើងចេញតាមការបញ្ជារបស់បុគ្គលិកសន្តិសុខ។

ក្នុងករណីខ្លះ លោកអ្នកអាចត្រូវបានគេតម្រូវឱ្យបុគ្គលិកសន្តិសុខស្ទាបដងខ្លួន ដោយប្រើឧបករណ៍សន្តិសុខ ឬមួយក៏តម្រូវឱ្យដោះសំលៀកបំពាក់ខ្លះចេញទៀតផង។ បើលោកអ្នកជំទាស់ លោកអ្នកនឹងមិនត្រូវបានគេអនុញ្ញាតឱ្យឡើងជិះយន្តហោះទេ។

ត្រូវបានហាមឃាត់ដាក់តាមកញ្ចប់វ៉ាលីសធំនូវវត្ថុដូចខាងក្រោមនេះ៖

• គ្រឿងផ្ទុះ គ្រាប់រំសេវ កាំជ្រួច បារីអេឡិចត្រូនិច
• គ្រឿងសម្ភារមានជាតិវិទ្យុសកម្ម
• ផលិតផលមានចំហេះ ឆ្នាំលាប
• សារធាតុស៊ីរេចរិល អុកស៊ីដករ សារធាតុធ្វើឱ្យក្រហាយ/រលាក
• ផលិតផលមានជាតិពុល ថ្នាំពុល
• សម្ភារមានដែនម៉ាញ៉េទិច
• ឧស្ម័ន

វត្ថុដែលមិនត្រូវបានអនុញ្ញាតឱ្យយកតាមអីវ៉ាន់យួរដៃ

• ដូចគ្នានឹងវត្ថុជាប់បម្រាមទាំងអស់សម្រាប់អីវ៉ាន់ថ្លឹងផ្ញើតាមយន្តហោះ
• សារធាតុរាវ គ្រឿងសម្អាង ស្ព្រេ (ដែលមានចំណុះលើសពី ១០០មីល្លីលីត្រ)
• វត្ថុអាចធ្វើឱ្យរបួស
• កាំបិត/កន្ត្រៃ
• អាវុធ ឬវត្ថុមានរាងអាវុធ

វត្ថុទាំងនេះអាចត្រូវបានអនុញ្ញាតឱ្យដាក់តាមកញ្ចប់អីវ៉ាន់ថ្លឹងផ្ញើតាមយន្តហោះ ប៉ុន្តែត្រូវមានការវេចខ្ចប់ឱ្យបានត្រឹមត្រូវដើម្បីកុំឱ្យវាបង្ករបួសដល់មន្ត្រីសន្តិសុខ និងបុគ្គលិកលើកដាក់អីវ៉ាន់។

ចំណាំ៖ សារធាតុរាវត្រូវដាក់ក្នុងដបមានចំណុះត្រឹម១០០មីល្លីលីត្រ ហើយខ្ចប់ថង់ផ្លាស្ទិកថ្លាទំហំ ២០x២០សង់ទីម៉ែត្រ ដែលអាចបិទបើកបាន។ អ្នកដំណើរម្នាក់អាចត្រូវបានអនុញ្ញាតឱ្យយួរថង់ផ្លាស្ទិកបិទបើកបានបែបនេះតែមួយទេ។

ករណីលើកលែង៖ លោកអ្នកត្រូវបានអនុញ្ញាតឱ្យយកតាមអីវ៉ាន់យួរដៃនូវវត្ថុខ្លះក្នុងបរិមាណសមល្មមនឹងរយៈពេលហោះហើរ ដូចមានរាយនាមខាងក្រោម៖

• អាហារសម្រាប់ទារក ឬកូនក្មេង
• ថ្នាំពេទ្យជាអង្គធាតុរាវដែលចាំបាច់សម្រាប់រយៈពេលហោះហើរ ប៉ុន្តែដាច់ខាតត្រូវមានអមដោយវេជ្ជបញ្ជាផង
• ទំនិញមានសារធាតុរាវដែលទិញក្រោយឆ្លងកាត់ការត្រួតពិនិត្យសន្តិសុខហើយ នៅតាមហាងក្នុងសាលរង់ចាំឡើងយន្តហោះ។ វត្ថុទិញនៅទីនេះត្រូវបានអនុញ្ញាតឱ្យយួរតាមខ្លួនឡើងយន្តហោះបាន ក្នុងបរិមាណដែលផ្នែកគយបានកំណត់រួចជាស្រេចហើយ។ ជាទូទៅ ផលិតផលទាំងនេះបានឆ្លងកាត់ការត្រួតពិនិត្យរួចហើយមុននឹងត្រូវបានយកទៅដាក់លក់។
• ថ្នាំអាំងសូលីនសម្រាប់អ្នកដំណើរមានជំងឺទឹកនោមផ្អែម ប៉ុន្តែដាច់ខាតត្រូវមានវេជ្ជបញ្ជាអមជាមួយផង។
• បារីអេឡិចត្រូនិច (ចំណាំ៖ អាចយកតាមខ្លួនបានមែន ប៉ុន្តែហាមជក់នៅក្នុងយន្តហោះដាច់ខាត)។